Bollivudning mashhur xonandasi O‘zbekiston haqida hind OAVga intervyu berdi.
Hind tilidagi ommabop «Navbharat Tayms» gazetasiga bergan intervyusida xonanda Toshkent va Farg‘ona vodiysiga tashrif doirasida turli oliy taʼlim muassasalari talabalari bilan uchrashgani, o‘zbek yoshlari Hindiston haqida ko‘p narsa bilishi va qadimiy xalq madaniyati bilan qiziqishiga urg‘u bergan.
"O‘zbekistondagi konsertlar men uchun ajoyib va esda qoladigan voqea bo‘ldi. Xonanda va sanʼatkor sifatida olgan muhabbatimni taʼriflashga so‘z ojiz. Yana boshqa biron joyda bu kabi muhabbat, mehr va quvonchga ega bo‘la olmasam kerak, deb o‘ylayman", deb qayd etgan edi xonanda bundan oldin “The Sunday Guardian" gazetasiga bergan eksklyuziv intervyusida.
"Musiqa ikki mamlakat o‘rtasida ulkan rishtalar yaratishiga ishonaman. Bir mamlakat vakili boshqa davlatning musiqa sanʼati ixlosmandlari huzurida chiqishlar qilganda o‘zaro mehr-muhabbatni mustahkamlash uchun qulay imkoniyat yuzaga keladi. O‘zaro eʼtirof esa ikki mamlakatni yana-da yaqinlashtirishga xizmat qiladi", deya fikrini izhor qilgan Shibani Kashyap.
Taniqli hind xonandasi, musiqa va ko‘ngilochar sohaning ko‘zga ko‘ringan vakili O‘zbekistonga safari chog‘ida ijtimoiy tarmoqlardagi sahifalariga faol tarzda postlar joylashtirib bordi. Uning, xususan, Instagram va Feysbukdagi akkauntlarida 2 milliondan ortiq obunachi bor.