3,75 минг доллар эвазига Умра ваъдаси: Самарқандда фирма раҳбари ушланди
У зиёратига боришни истаган уч нафар фуқаронинг ишончига кириб, барча зарур шароитларни яратиб беришни ваъда қилган.

ДХХ Самарқанд вилояти бўйича бошқармаси ва вилоят ИИБ ҳамкорлигида ўтказилган тезкор тадбир давомида сайёҳлик фирмаси раҳбари қўлга олинди.
Маълум қилинишича, Самарқанд шаҳрида фаолият юритувчи фирма раҳбари «Умра» зиёратига боришни истаган уч нафар фуқаронинг ишончига кириб, уларни зиёратга юбориш ҳамда муқаддас амалларни бажариш учун зарур шароитларни яратиб беришни ваъда қилган. Бунинг эвазига у 3 750 АҚШ доллари талаб қилган.
Тезкор тадбир давомида фирма раҳбари олдиндан келишилган пулнинг 3 000 долларини олаётган вақтида ашёвий далиллар билан ушланган.
Ҳозирда мазкур ҳолат юзасидан тергов-суриштирув ҳаракатлари олиб борилмоқда.








