O‘zbekistonda metan yoqilg‘i quyish shoxobchalariga cheklov joriy etilgani haqidagi xabarlar haqiqatga to‘g‘ri kelmaydi. Bu haqda “Hududgazta’minot” AJ matbuot xizmati rasmiy bayonot berdi.
Kompaniya ma’lum qilishicha, ijtimoiy tarmoqlarda tarqalgan “metan zapravkalar faoliyati cheklanmoqda” degan ma’lumotlar asossiz. Ayni paytda gaz ta’minoti tizimi barqaror ishlamoqda, barcha yoqilg‘i quyish shoxobchalari odatdagi rejimda aholiga xizmat ko‘rsatmoqda.
Ta’kidlanishicha, kuz-qish mavsumiga tayyorgarlik doirasida ayrim gaz taqsimlash stansiyalarida rejalashtirilgan profilaktika va ta’mirlash ishlari olib borilgan. Shu sababli ayrim hududlarda bosimning qisqa muddatga pasayishi kuzatilgan bo‘lishi mumkin.
“Vaqtinchalik noqulayliklar uchun iste’molchilardan uzr so‘raymiz. Bugungi kunda mamlakat bo‘ylab barcha metan yoqilg‘i quyish shoxobchalari normal holatda ishlamoqda”, — deyiladi kompaniya bayonotida.