Метрога яқин корхоналар иш вақти ўзгариши кутилмоқда
Унга кўра, иш соат 08:00 да эмас 09:00 да бошланиши мумкин.
Метрополитен бош муҳандиси Мирҳоким Мирҳусановнинг айтишича, пойтахтда жойлашган йирик ишлаб чиқариш ташкилотлари ва ўқув муассасаларида бир вақтнинг ўзида (соат 08:00 ва 09:00 оралиғида) иш куни ва дарсларнинг бошланиши айни шу вақт оралиғида метрополитенда бир қатор тирбандликларни келтириб чиқармоқда.
У юзага келиши мумкин бўлган юкламаларни камайтириш мақсадида метро бекатларига яқин бўлган 27 ОТМда дарсларнинг бошланиш вақти дифференциал тартибда ўзгартирилганини таъкидларкан, ечим сифатида йирик ишлаб чиқариш корхоналарида ҳам иш вақтини ўзгартириш таклифи илгари сурилаётганини айтди.
Тошкент метрополитени режим хизмати бошлиғи ўринбосари Абдутоҳир Абдуқодиров ҳам ОТМларда ўқишнинг бошланиш вақти ўзгартирилгани анча ижобий ўзгаришларга олиб келганини қайд этди. У ҳукумат, Транспорт вазирлиги ҳамда тегишли мутасаддилар билан ҳамкорликда йирик корхоналарда иш бошланиши вақтини қайтадан кўриб чиқиш бўйича таклифлар ишлаб чиқилаётганини қўшимча қилди.
