Misr hukumati tomonidan O‘zbekiston shifoxonalarida foydalanish uchun insonparvarlik yordami sifatida ajratilgan, dunyoda keng tarqalgan kasalliklardan biri – “gepatit C”ga qarshi “Daklatasvir” dori vositasining dastlabki partiyasi Toshkent xalqaro aeroportida kutib olindi. Bu haqda “Dunyo” agentligi xabar berdi.
Qayd etilishicha, O‘zbekistonning Qohiradagi elchixonasi tomonidan ishlab chiqilgan yukning mamlakatga olib kelinishi O‘zbekiston va Misr o‘rtasida sog‘liqni saqlash sohasida hamkorlikni yana-da jadallashtirish, virusologiyada o‘zaro qo‘llab-quvvatlashni tashkil etish doirasida avval erishilgan kelishuvlarning amaliy natijasi hisoblanadi.
Umumiy qiymati 35 ming dollarni tashkil etgan 17 ming qutidan ortiq “Daklatasvir” dori vositasi O‘zbekiston Sog‘liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlar uchun ishlatiladi.
Taʼkidlanishicha, O‘zbekiston va Misr sog‘liqni saqlash idoralari 2023—2024 yillar davomida umumiy qiymati 4,8 million dollarlik jami 800 ming dona (40 tonnaga yaqin) “gepatit C”ga qarshi “Daklatasvir” va “Sofosbuvir” dori vositalarini mamlakatga bepul yetkazib berish bo‘yicha kelishuvga erishgan.
Aprel boshlarida O‘zbekistonda 1 million aholi virusli gepatitning B va C turlariga qarshi skriningdan o‘tkazilishi maʼlum qilingandi. Mazkur tekshiruvlarda virusli “gepatit C” kasalligi tasdiqlangan 10,5 ming nafar bemorlarda davolash tadbirlari amalga oshiriladi.
Misr hukumati O‘zbekistonga “gepatit C”ga qarshi dori vositalarini yubordi.