Туркияда ўлдирилган самарқандлик аёлнинг жасади Ўзбекистонга олиб келинди
Жиноятда гумонланиб 4 нафар шахс қўлга олинган.
Туркияда ўлдирилган, асли самарқандлик 46 ёшли Дилафруз Чуллиеванинг жасади Ўзбекистонга қайтарилди. Бу ҳақда Истанбул бош консулхонаси маълум қилди.
Маълум қилинишича, марҳуманинг жасади Ўзбекистоннинг Истанбул шаҳридаги Бош консулхонаси ҳамда Ташқи меҳнат миграцияси агентлиги кўмагида Ўзбекистонга олиб келинган.
Дилафруз Чуллиева 2026 йил 25 январь куни Туркиянинг Баликесир ҳудудидаги иш жойидан номаълум томонга чиқиб кетган ва бедарак йўқолган. Шундан сўнг унинг ўғли Ўзбекистон Ташқи ишлар вазирлигининг Консуллик-ҳуқуқий департаментига мурожаат қилган.
Мурожаатдан кейин Ўзбекистоннинг Туркиядаги дипломатик ваколатхоналари Туркия Ташқи ишлар вазирлигига нота юборган ҳамда Туркия Ички ишлар вазирлиги Хавфсизлик бош бошқармаси билан ҳамкорликда қидирув ишлари бошланган.
Анқарадаги Ўзбекистон элчихонаси ва Истанбулдаги Бош консулхона, диаспора вакиллари, адвокатлар ҳамда ижтимоий тармоқ фаоллари томонидан қидирув ишлари олиб борилган. 2026 йил 28 февраль куни Баликесир туманидаги ўрмон ҳудудидан шахси номаълум жасад топилган.
Жасад узоқ вақт давомида қолиб кетгани сабабли уни ташқи кўринишидан аниқлаш имкони бўлмаган. Шу боис топилган жасад ҳамда марҳуманинг ўғлидан олинган қон намуналарини солиштириш орқали ДНК текшируви ўтказилган ва жасад Дилафруз Чуллиевага тегишли экани тасдиқланган.
Мазкур жиноятда гумонланиб 4 нафар шахс қўлга олинган. Ҳозирда тергов ҳаракатлари давом этмоқда.
Мутасаддилар ижтимоий тармоқларда тасдиқланмаган маълумотларни тарқатмасликни сўраб, марҳуманинг яқинларига ҳамдардлик билдирди.
