Наманганлик аёл эрининг эътиборини тортиш учун жиноятга қўл урди

 

Наманган вилоятининг Тўрақўрғон туманида аёл эрининг эътиборини тортиш мақсадида жиноятга қўл урди. Ҳолат юзасидан вилоят ИИБ маълумот берди.

 

Жорий йилнинг 10 февраль куни Тўрақўрғон тумани ИИБга 21 ёшли Б.М. қўнғироқ қилиб, номаълум шахс унинг хонадонига юзига ниқоб таққан ҳолда кириб, уни ва 1 ёшли қизини ўлдириш билан қўрқитганини, ҳаёт ва соғлик учун хавфли бўлган зўрлик ишлатиб қўлида бўлган пичоқ билан унинг бўйин қисмига жароҳат етказгани ва уйида бўлган нархи 19 млн 200 минг сўмлик тилла-тақинчоқларини босқинчилик йўли билан қўлга киритиб, воқеа жойидан яширинганини хабар қилган.

 

Мазкур ҳолат юзасидан туман ИИБ ҳузуридаги Тергов бўлинмаси томонидан номаълум шахсга нисбатан Жиноят кодекснинг 164-моддаси 3-қисми «в» банди (босқинчилик) билан жиноят иши қўзғатилган.

 

Маълум бўлишича, жабрланувчи Б.М. турмуш ўртоғи унга нисбатан беэътибор бўлаётгани сабабли унинг эътиборини ўзига жалб қилиш мақсадида,шу куни хонадонида ҳеч ким йўқлигидан фойдаланиб, барча хоналарини титиб ташлаган. Бирга яшовчи қайнонаси ётоқхонасидан 19 млн 200 минг сўмлик тилла-тақинчоқларини яшириб, бўйнига игна орқали шилинма тортган ва гўёки яшаш хонадонига номаълум шахс ғайриқонуний равишда кириб, пичоқ билан ўзи ва чақалоғини ўлдириш билан қўрқитиб, тилла тақинчоқларни олиб кетганлиги ҳақида Тўрақўрғон тумани ИИБга ёлғон хабар берган.

 

Б.М.нинг яшаш хонадони кўздан кечирилганда ўзи томонидан яширилган тилла тақинчоқлар ашёвий далил сифатида холислар иштирокида расмийлаштириб олинган.

 

Мазкур ҳолат юзасидан Б.М. Жиноят кодекснинг 237-моддаси 2-қисми «Г» банди (ўта оғир жиноят содир этишда айблаб содир этилган ёлғон хабар бериш) билан айбланувчи тариқасида ишда иштирок этишга жалб қилиниб, унга нисбатан «гаров» эҳтиёт чораси қўлланилган.

 

Жиноят иши айблов хулосаси билан тегишли судлов органига юбориш масаласини ҳал этиш учун Тўрақўрғон туман прокуратурасига юборилган.