“The Times of Israel” nashrining yozishicha, Isroil bosh vaziri Binyamin Netanyahu mamlakat prezidenti Is’hoq Gertsogga o‘zini afv etish bo‘yicha rasmiy murojaat bilan chiqqan. Prezident apparati ma’lumotiga ko‘ra, Adliya vazirligining afv bo‘limi barcha tegishli idoralarning fikrini yig‘ib, tavsiyalarni prezidentning yuridik maslahatchisiga taqdim etadi.
Netanyahuga qarshi korrupsiya bo‘yicha dastlabki tergov 2016-yil dekabrda boshlangan, 2019-yilda esa u bir nechta jinoyat epizodlari bo‘yicha rasmiy ravishda ayblangan. Netanyahu esa barcha ayblovlarni qat’iyan rad etib kelmoqda. Xabarlarga ko‘ra, u milliardер va Gollivud prodyuseridan o‘z manfaatlari yo‘lida qimmatbaho sovg‘alar olganlikda, shuningdek, ommaviy axborot vositalari magnatlariga o‘zi va oilasi faoliyatini ijobiy yoritish evaziga yordam berganlikda gumon qilinmoqda.
Avvalroq AQSH prezidenti Donald Tramp ham Isroil prezidentiga maktub yo‘llab, Netanyahu ustidan olib borilayotgan korrupsiya ishini to‘xtatish iltimosini bildirgani haqida xabar berilgandi.