Toshkent viloyatida “Xavfsiz va sogʻlom yurt” tezkor-profilaktik tadbirlari samarali davom etmoqda
Respublika miqyosida olib borilayotgan “Xavfsiz va sogʻlom yurt” keng qamrovli tezkor-profilaktik tadbirlari doirasida Toshkent viloyati Ichki ishlar boshqarmasi va uning quyi tizim xodimlari tomonidan jamoat tartibini taʼminlash hamda jinoyatchilik va huquqbuzarliklarning oldini olish uchun kuchaytirilgan nazorat ishlari olib borilmoqda.
Oʻtkazilgan tezkor tadbirlar natijasida OITS (orttirilgan immunitet tanqisligi sindromi) tarqalishiga aloqador 2 ta jinoiy holat fosh etildi. Ushbu holatlar yuzasidan tegishli choralar koʻrilib, boshqalarga infeksiya yuqishining oldi olindi. Xususan, Ohangaron shahrida 1998-yilda tugʻilgan ayol Z.R.ga nisbatan Jinoyat kodeksining 113-moddasi asosida jinoyat ishi qoʻzgʻatildi, chunki u OITS markazida roʻyxatga olinganiga qaramay, 2004-yilda tugʻilgan erkak bilan jinsiy aloqada boʻlganligi aniqlangan.
Shuningdek, axloq va sogʻliqni saqlashga qarshi jinoyatlar boʻyicha 6 ta holat aniqlanib, barchasi boʻyicha qonuniy choralar koʻrildi.
Uyushgan jinoyatchilikka qarshi kurash doirasida noqonuniy qurol saqlash bilan bogʻliq 3 ta jinoiy holat fosh qilindi. Tadbir davomida 1 ta jangovar qurol, 7 ta pnevmatik qurol, 4 ta ov miltigʻi va 51 dona oʻq-dori daliliy ashyo sifatida olindi.
Ichki ishlar organlari tomonidan oʻtkazilayotgan bu chora-tadbirlar hududda xavfsizlikni taʼminlash va fuqarolarning osoyishtaligini mustahkamlashga xizmat qilmoqda.