Afrikada sug‘orish imkoniyatlari yuqori bo‘lishiga qaramay, qit’adagi qishloq xo'jaligining aksariyat qismi hali ham yomg'irga bog'liq va iqlim o'zgarishiga qarshi himoyasiz bo'lib qolmoqda. Bu holat oziq-ovqat xavfsizligiga jiddiy tahdid tug‘dirayotgani sabab, BMT universiteti rahbarligidagi Suv, atrof-muhit va sog‘liqni saqlash instituti (UNU-INWEH) bir qator xalqaro hamkorlar bilan birgalikda Afrika Ittifoqi uchun yangi tahliliy hisobotni e’lon qildi.
Xabarlarga ko‘ra, hujjatda qit’a bo‘ylab sug‘orish tizimlarini kengaytirish iqlim xavfiga moslashish va hosildorlikni oshirish yo‘lida muhim qadam sifatida ko‘rsatilgan. Biroq, ekspertlar bu jarayon ekologik, ijtimoiy va boshqaruv jihatlarini hisobga olgan holda olib borilishi kerakligini ta’kidlamoqda. Xususan, landshaftning o‘zgarishi, suv ifloslanishi, mahalliy hokimiyat tuzilmalaridagi o‘zgarishlar va suv resurslaridan adolatli foydalanish kabi masalalar alohida qayd etilgan.
“Barqaror sug‘orish faqat hosildorlik haqida emas. Bu — odamlar va tabiatga foyda keltiruvchi adolatli va barqaror oziq-ovqat tizimlarini shakllantirish haqida”, — dedi loyiha rahbari, professor Tafadzva Mabhaudhi.
Strategiyani ishlab chiqqan Afrika Ittifoqi komissiyasi esa suv resurslarini boshqarishda tizimli va izchil yondashuvni taklif qilmoqda. Mutaxassislar bu strategiyani qit’a agrar sektorini isloh qilish va oziq-ovqat xavfsizligini ta’minlashda burilish nuqtasi sifatida ko‘rmoqda.
UNU-INWEH direktori, professor Kaveh Madanining ta’kidlashicha, “suv, energiya va ekologik tizimlar bo‘yicha kompleks yondashuv Afrikaning agrar salohiyatini ochish va iqlimiy zaifliklarni kamaytirishning asosiy kalitidir”.