O‘zbekiston Respublikasi Prezidenti qayd etganidek, bugungi kunda Oliy Majlis eng kuchli parlamentlarga xos barcha nazorat vakolatlariga ega.
Xususan, 2023-yildan buyon tashqi qarz miqdorini parlament belgilab kelmoqda.
Endilikda Prezident taklifiga ko‘ra, davlat kafolati ostida tashqi qarz olish masalasi ham Parlament vakolatiga o‘tkaziladi.
Shuningdek, davlat xaridlarida tovar, ish va xizmatlarni to‘g‘ridan-to‘g‘ri sotib olish mumkin bo‘lgan holatlar faqat qonun bilan belgilanadi.
Konstitutsiyaviy islohotlar doirasida viloyat hokimlari va mahalliy kengashlar raislari lavozimlari bir-biridan ajratilgan edi. Endi bu tizim 2026-yildan 208 ta tuman va shaharda ham yo‘lga qo‘yiladi.
Prezident ta’kidlashicha:
“Ayni paytda ushbu jiddiy siyosiy islohot hokimlar va ijro idoralaridan Kengashlarga munosabatni mutlaqo o‘zgartirishni talab qiladi. Bundan buyon deputat so‘rovlari ijrosi har chorakda tahlil qilinib, sustkashlikka yo‘l qo‘yilgan holatlar bo‘yicha prokuraturaga taqdimnoma kiritiladi.”