Qirg‘izistonning O‘sh shahrida og‘ir oilaviy zo‘ravonlik holati qayd etildi. Bugun, 24-yanvar kuni erta tongda ko‘p qavatli uylar hovlisida mast erkak o‘z xotinini shafqatsizlarcha kaltaklab, qorniga pichoq bilan jarohat yetkazgan. Hodisa guvohlarining aytishicha, voqea taxminan soat 4:00 atrofida sodir bo‘lgan. Bu haqda “24kg” nashri xabar berdi.
Ma’lum qilinishicha, ayol og‘ir ahvolda shifoxonaning reanimatsiya bo‘limiga yotqizilgan. Qo‘shnilarning so‘zlariga ko‘ra, er-xotinning ikki nafar voyaga yetmagan farzandi bor. Holat yuzasidan O‘sh viloyati Ichki ishlar departamenti rasmiy izoh bergan.
Departament ma’lumotiga ko‘ra, taxminan soat 5:00 da Ok-Buura tuman militsiya bo‘limiga tez tibbiy yordam xodimlaridan 1999-yilda tug‘ilgan ayol tan jarohatlari bilan shifoxonaga olib ketilgani haqida xabar tushgan. Dastlabki ma’lumotlarga ko‘ra, jabrlanuvchi eridan qochishga uringan paytda jarohat olgan.
Huquqni muhofaza qiluvchi organlar mast holatda bo‘lgan 32 yoshli erkakni qisqa fursatda qo‘lga olgan. Hozirda ayol shifoxonada davolanmoqda, shifokorlar uning ahvolini qoniqarli deb baholamoqda. Voqea yuzasidan tergov harakatlari olib borilmoqda, qo‘shimcha ma’lumotlar keyinroq taqdim etilishi ma’lum qilindi.