Ўзбекистон вакили Франциянинг "Санъат ва адабиёт" ордени билан тақдирланди
У ҳар йили дунё бўйлаб 60 кишига берилади.
Кеча Франция Маданият вазирлигида Ўзбекистон Маданият ва санъатни ривожлантириш жамғармаси раиси Гаяне Умеровага "Санъат ва адабиёт" (Ордре дес Артс эт дес Леттрес) ордени кавалери нишонини топшириш маросими бўлиб ўтди, деб хабар қилмоқда «Дунё» АА мухбири.
Франция маданият вазири Рашида Дати тақдирлаш маросимидаги нутқида Президент Шавкат Мирзиёев раҳнамолигида Ўзбекистонда маданият соҳасини ривожлантириш борасида амалга оширилаётган изчил давлат сиёсатини эътироф этиш боробарида, бу Франция билан стратегик шериклик муносабатларини мустаҳкамлашга хизмат қилаётганини таъкидлади.
"Ушбу юксак мукофот Ўзбекистоннинг халқаро маданий алоқаларни мустаҳкамлаш ва санъат соҳасида глобал мулоқотни ривожлантиришга қўшган саъй-ҳаракатлари ва ҳиссасининг эътирофидир. Ҳукумат, Президент маъмурияти ва Франция Ташқи ишлар вазирлиги, дипломатик корпус вакиллари, маданият арбоблари ва халқаро ҳамкорлар иштирокида Ўзбекистон вакилининг ушбу орден билан тақдирлангани Янги Ўзбекистон маданий дипломатияси самарадорлигининг ёрқин далилидир", - деди вазир Рашида Дати.
Эслатиб ўтамиз, Гаяне Умерова Ўзбекистондаги Ислом цивилизацияси маркази илмий кенгаши аъзоси ҳисобланади.
Сўнгги йилларда Ўзбекистон ва Франция ўртасидаги маданият ва санъат соҳасидаги ҳамкорлик бир қатор муҳим ташаббуслар – Луврда ўзбек меросига оид кенг кўламли кўргазмадан тортиб, халқаро маданий анжуманларда фаол иштирок этишгача бўлган ишлар туфайли янги босқичга кўтарилди.
Шу нуқтаи назардан, давлатимиз раҳбари ташаббусларини амалга оширишда устувор лойиҳаларни амалга ошираётган Ўзбекистон маданияти ва санъатини ривожлантириш жамғармаси муҳим ўрин тутмоқда.
"Санъат ва адабиёт" ордени кавалери нишони Францияда, шунингдек, бутун дунёда санъат ва адабиётнинг гуллаб-яшнашига қўшган хизматларини тақдирлаш учун ҳар йили дунё бўйлаб 60га яқин кишига берилади.
Ўзбекистондаги Ислом цивилизацияси маркази жамоаси Гаяне Умеровани ушбу юксак эътироф билан чин дилдан муборакбод этади.
