Навоийда ЙТҲ оқибатида 4 киши вафот этди
Фожиага ҳайдовчининг қувиб ўтиш қоидасини бузиши сабаб бўлган.
Конимех туманида 4 кишининг ўлимига сабаб бўлган ЙТҲ содир бўлди. Бу ҳақида “Миллар” дастурида хабар берилди.
Маълум қилинишича, ЙТҲ 22 февраль куни Конимех тумани ҳудудида, “Навоий–Зарафшон–Учқудуқ” автомобиль йўлида содир бўлган. Nexia ҳайдовчиси ўзи билан бир йўналишда ҳаракатланаётган автомобилни қувиб ўтишга уринган. Аммо бунга улгурмасдан қарама-қарши йўналишда келаётган юк машинаси билан тўқнашган.
Nexia машинаси тезлиги белгиланган чекловдан юқори бўлгани айтилмоқда. ЙТҲ оқибатида 2 киши воқеа жойида, яна 2 киши эса шифохонада вафот этган.
Ҳозирда ҳолат юзасидан жиноят иш қўзғатилиб, тергов ҳаракатлари олиб борилмоқда.
