Ўзбекистонда экологик назорат ваколатлари кенгайтирилиши мумкин
Шавкат Мирзиёев экологик сиёсат ва бошқарув самарадорлигини ошириш бўйича таклифлар тақдимоти билан танишди.
Шавкат Мирзиёев экология ва атроф-муҳитни муҳофаза қилиш соҳасидаги ишлар самарадорлигини оширишга қаратилган таклифлар тақдимоти билан танишди. Президент матбуот хизмати маълум қилишича, сўнгги йилларда яшил ҳудудларни кўпайтириш ва ҳаво сифатини яхшилаш борасида кенг кўламли ишлар амалга оширилаётганига қарамай, ваколатларнинг тарқоқлиги сабабли натижалар кутилган даражага етмаяпти.
Йиғилишда атмосферани тозалаш, дарахтларни асраш, яшил ҳудудларни кенгайтириш бўйича лойиҳаларни марказлашган тартибда бошқариш таклиф этилди. Шунингдек, экологик назоратни кучайтириш, қоидабузарликларга тезкор жавоб бериш ва жамоатчилик назорати механизмларини кенгайтириш масалалари муҳокама қилинди.
Президент соҳадаги ваколатларни қайта кўриб чиқиш, масъул идоралар жавобгарлигини ошириш ҳамда тартибга солиш тизимини такомиллаштириш бўйича топшириқлар берди. Унга кўра, саноат корхоналарида экологик талабларга риоя этишни кучайтириш ва жойларда яшил зоналарни сақлаш алоҳида назоратга олинади.
Маълумот ўрнида, 2024 йил ва 2025 йилнинг биринчи ярмида экологияга оид 220 та жиноят иши кўрилган бўлиб, уларнинг аксарияти ноқонуний дарахт кесиш, ўрмон ва ҳайвонот дунёсига зарар етказиш билан боғлиқ бўлган. Жиноятларнинг энг катта қисми Қорақалпоғистон, Жиззах, Сирдарё ва Сурхондарёда қайд этилган.
