Яқин Шарқдан 25 мингдан ортиқ ўзбекистонлик ватанига қайтарилди
Қайтарилганларнинг асосий қисми Саудия Арабистони ва БААдан олиб келинган.
10-март куни эрталаб ҳолатига кўра, Яқин Шарқ мамлакатларидан Ўзбекистонга қайтарилган фуқаролар сони 25 047 нафарга етди. Бу ҳақда Ўзбекистон Республикаси Ташқи ишлар вазирлиги матбуот хизмати маълум қилди.
Маълум қилинишича, ватандошларни эвакуация қилиш ишлари тизимли ва босқичма-босқич амалга оширилмоқда ҳамда минтақадаги олти давлатни қамраб олмоқда.
Қайтарилган фуқароларнинг асосий қисми Саудия Арабистонидан бўлиб, ушбу мамлакатдан 21 мингдан ортиқ ўзбекистонлик ватанига олиб келинди. Шунингдек, Бирлашган Араб Амирликларидан 3500 дан ортиқ фуқаро Ўзбекистонга қайтарилди.
Бундан ташқари, Қатар, Эрон, Баҳрайн ва Уммон ҳудудларидан ҳам ўзбекистонликларни олиб келиш бўйича махсус рейслар ташкил этилди.
Ташқи ишлар вазирлиги эвакуация ишлари, асосан, фуқаро авиацияси учун ҳаво ҳудуди очиқ бўлган давлатлар орқали амалга оширилаётганини таъкидлади.
