Қирғизистонда Рамазон ҳайити 20 март куни нишонланади
Қарор Туркий давлатлар ташкилотига аъзо мамлакатлар муфтийлари фатвоси асосида қабул қилинган.
Қирғизистон мусулмонлари идораси маълум қилишича, мамлакатда 2026 йилги Рамазон ҳайити 20 март, жума куни нишонланади. Бу қарор Туркий давлатлар ташкилоти (ТДТ)га аъзо мамлакатлар муфтийларининг фатво чиқариш бўйича йиғилишида қабул қилинган.
Фатво ҳайъатига ТДТга аъзо мамлакатлар – Туркия, Озарбайжон, Қозоғистон, Қирғизистон, Ўзбекистон, шунингдек, ТДТ кузатувчи давлатлари – Туркманистон ва Венгрия расмий мусулмон диний идоралари вакиллари киради.
Эслатиб ўтамиз, феврал ойида Туркий давлатлар ташкилоти Мусулмон диний идоралари раҳбарлари кенгашининг Фатво ҳайъати Самарқандда бўлиб ўтган йиғилишида 2026 йилда Рамазон ойининг биринчи куни 19 февраль, пайшанба кунига, Рамазон ҳайити эса 20 март, жума кунига тўғри келиши кутилганини белгилаган.
Шунингдек, 2–4 февраль кунлари Самарқанд шаҳрида Туркий давлатлар ташкилоти мамлакатлари Мусулмон диний идоралари раҳбарлари кенгаши ҳузуридаги Фатво ҳайъатининг маслаҳат йиғилиши бўлиб ўтган. Тадбир Ўзбекистон мусулмонлари идораси раҳбарлигида ташкил қилинган бўлиб, унга ТДТга аъзо мамлакатлар диний идоралари вакиллари ҳамда ислом уламоалари иштирок этган.
