O‘zbekistonda qurilish sohasida mehnat faoliyati bilan bog‘liq baxtsiz hodisalar va ular oqibatidagi o‘lim holatlari keskin oshdi. Kambag‘allikni qisqartirish va bandlik vazirligi ma’lumotiga ko‘ra, 2024-yilda sohaga oid 204 ta baxtsiz hodisa qayd etilib, 71 nafar ishchi vafot etgan.
2025-yilda esa holat yanada og‘irlashgan. O‘tgan yil davomida qurilish sohasida 234 ta baxtsiz hodisa sodir bo‘lgan bo‘lib, ular oqibatida 99 nafar ishchi hayotdan ko‘z yumgan. Shu tariqa, mehnat jarayonida eng ko‘p o‘lim holatlari aynan qurilish sohasida qayd etilgan.
Vazirlikning ta’kidlashicha, aksariyat fojiali holatlar mehnat xavfsizligi qoidalariga rioya qilinmasligi, ishchilarning shaxsiy himoya vositalari bilan yetarlicha ta’minlanmagani hamda nazorat mexanizmlarining sustligi bilan bog‘liq.
Mutasaddilar mehnat xavfsizligi masalasiga loqayd qarash inson hayoti uchun jiddiy xavf tug‘dirishini qayd etib, bu talablar faqat hisobot uchun emas, balki real hayotni asrash uchun zarurligini eslatmoqda.