O‘zbekistonda temiryo‘l infratuzilmasi obyektlarining nomlari davlat tili me’yorlariga moslashtiriladi.
Hukumatning 17-oktyabr kuni qabul qilingan qaroriga muvofiq, “O‘zbekiston temir yo‘llari” aksiyadorlik jamiyati tasarrufidagi barcha vokzallar, stansiyalar va razyezdlarning nomlari o‘zbek tilining imlo qoidalari hamda davlat tili to‘g‘risidagi qonun talablari asosida yagona lotin yozuvida bayon etiladi.
Transport vazirligi va “O‘zbekiston temir yo‘llari” kompaniyasiga uch oy muddatda barcha temiryo‘l obyektlaridagi peshlavhalar, axborot ko‘rsatkichlari va elektron yozuvlarni davlat tili me’yorlariga mos shaklda yangilash topshirildi.
Mazkur jarayon doirasida rasmiy hujjatlar, ma’lumotlar bazalari va tegishli tizimlarga zarur o‘zgartirishlar kiritiladi.
Qarorga ilova qilingan ro‘yxatda Qoraqalpog‘iston Respublikasi, viloyatlar va Toshkent shahrida joylashgan jami 320 ta vokzal, stansiya va razyezd nomlarini moslashtirish nazarda tutilgan.
Qarorning ijrosini ta’minlash mas’uliyati Bosh vazir o‘rinbosari Ochilboy Ramatov va transport vaziri Ilhom Mahkamov zimmasiga yuklatildi.