O‘zbekiston fuqarolari uchun Yevropa Ittifoqi davlatlariga vizasiz kirish masalasi oson hal bo‘ladigan jarayon emas. O‘zbekistonning Germaniyadagi elchisi Dilshod Ahatovning ta’kidlashicha, bunday rejimni joriy etish uchun Yevroittifoqqa a’zo barcha 27 davlat, shuningdek, Shengen hududiga kiruvchi boshqa mamlakatlarning ham roziligi talab etiladi. Chunki Germaniyaga vizasiz kirish avtomatik tarzda butun Shengen hududi bo‘ylab erkin harakatlanish imkonini beradi.
Diplomatning aytishicha, Shengen hududida ichki chegaralar mavjud emas va bir davlatga kirgan shaxs boshqa mamlakatlarga ham bemalol o‘ta oladi. Shu sababli vizasiz rejim faqat bir davlat bilan emas, balki qariyb 30 dan ortiq mamlakat bilan bir vaqtning o‘zida kelishuvni talab qiladi. Elchi bu masala kelajakda bosqichma-bosqich hal bo‘lishi mumkinligini, biroq oldinda yechilishi lozim bo‘lgan muammolar ko‘pligini qayd etdi.
Shu bilan birga, Germaniya bugungi kunda chet ellik ishchi kuchiga juda muhtoj. Bunga mamlakatdagi demografik vaziyat sabab bo‘lmoqda: aholi soni sekin o‘smoqda, tug‘ilish darajasi past, keksalar soni esa ortib bormoqda. Natijada Germaniya iqtisodiyotni ushlab turish uchun xorijdan malakali mutaxassislarni faol jalb qilmoqda. Asosiy talablar — nemis tilini bilish va kasbiy tayyorgarlikka ega bo‘lish.
Elchi Ahatovning so‘zlariga ko‘ra, 2024-yilda Germaniya va O‘zbekiston o‘rtasida migratsiya va mobillik bo‘yicha imzolangan bitim ijobiy natija bermoqda. 2025-yilning o‘zida ikki mingdan ortiq o‘zbekistonlik yosh mutaxassis Germaniyada ishlashni boshlagan. Dual ta’lim tizimi orqali ular o‘qish bilan birga ishlash, oylik olish va keyinchalik barqaror ish o‘rniga ega bo‘lish imkoniyatiga ega. Bugungi kunda Germaniyada 15 mingdan ziyod o‘zbekistonlik istiqomat qilayotgani ham bu hamkorlik tobora kengayayotganidan dalolat beradi.