Bir necha kun oldin “Nihol” mukofoti sovrindori Lola Yo‘ldoshevaning klip premyerasi paytida sahnadagi kiyinish madaniyati ijtimoiy tarmoq foydalanuvchilari tomonidan turli muhokamalarga sabab bo‘ldi.
Holatga oydinlik kiritish maqsadida joriy yilning 18-aprel kuni xonanda “O‘zbekkonsert” davlat muassasasiga taklif etilib, holat yuzasidan suhbat olib borilgan. Xonandaga yana bir marta litsenziya talablari eslatilgan.
Lola bunday vaziyatda tashkilot xonandaning manfaatlarini himoya qilishi kerakligini bildirib ranjigan.
Shu o‘rinda, “O‘zbekkonsert” davlat muassasasi barcha san’atkorlardan sahna madaniyatiga rioya etishlarini so‘rab murojaat qilgan: O‘zbekiston Respublikasi “Madaniy faoliyat va madaniyat tashkilotlari to‘g‘risida”gi Qonunining 21-moddasi va Vazirlar Mahkamasining 2022-yil 21-fevraldagi 80-son qarori bilan tasdiqlangan “Maxsus elektron tizim orqali ayrim faoliyat turlarini litsenziyalash tartibi to‘g‘risida yagona Nizom” bilan tasdiqlangan pasportning litsenziya talab va shartlarida: “konsert-tomosha tadbirlarida ijrochilarning odob-axloq qoidalariga, sahna madaniyati, tashqi ko‘rinish madaniyatiga zid bo‘lgan xatti-harakatlarni hamda tomoshabinlarning his-tuyg‘ularini haqorat qilmaslik kabi vazifalar belgilangan.