Yagona interaktiv davlat xizmatlari portali (YAIDXP) va Davlat xizmatlari markazlarida haydovchilik guvohnomalarini almashtirish amaliyoti vaqtincha to‘xtatiladi. Bu haqda Davlat xizmatlari agentligi maʼlum qildi.
IIV tomonidan Davlat yo‘l harakati xavfsizligi xizmati sohasida “Yagona avtomatlashtirilgan axborot tizimi” joriy qilingani munosabati bilan 1—5 sentyabr kunlari texnik-profilaktik ishlar amalga oshirilishi bunga sabab qilib ko‘rsatilgan.
"Shu sababdan YAIDXP va Davlat xizmatlari markazlarida, eski namunadagi haydovchilik guvohnomasini yangi namunadagi haydovchilik guvohnomasiga almashtirish va boshqa avtotransport vositasiga bog‘liq davlat xizmatlarini ko‘rsatish vaqtinchalik to‘xtatiladi", - deyilgan xabarda.
Qayd etilishicha, texnik-profilaktik tadbirlar yakunlanishi bo‘yicha qo‘shimcha axborot beriladi.