Kremlda Rossiya va AQSH o‘rtasida Ukrainadagi mojaro yechimi bo‘yicha navbatdagi muzokaralar bo‘lib o‘tdi. Rossiya OAV xabariga ko‘ra, uchrashuv qariyb besh soat davom etgan.
Muzokaralarda Rossiya tomonidan prezident Vladimir Putin, uning yordamchisi Yuriy Ushakov hamda prezidentning maxsus vakili Kirill Dmitriyev ishtirok etdi. AQSH delegatsiyasini esa prezidentning maxsus vakili Stiv Uitkoff va Donald Trampning kuyovi Jared Kushner boshqardi.
Yuriy Ushakovning ma’lum qilishicha, Vladimir Putin Vashington tomonidan taqdim etilgan bir qator takliflarga nisbatan tanqidiy va salbiy munosabat bildirgan. Muzokaralar davomida “aniq hududiy masalalar” ham muhokama qilingan.
“Hozircha tomonlar o‘rtasida murosali variant topilmadi. Shunga qaramay, amerikaliklar bildirgan ayrim takliflar mutlaqo rad etiladigan darajada emas, ular muhokamaga loyiq. Biroq bizga mos kelmaydigan ifodalar ham bor. Muzokara davom etadi”, — dedi Ushakov.
Uning so‘zlariga ko‘ra, uchrashuv “foydali, konstruktiv va mazmunli” ruhda o‘tgan. Jurnalistlarning “muzokaralardan so‘ng tinchlik yaqinlashdimi yoki uzoqlashdimi?” degan savoliga Ushakov: “Anig‘i — uzoqlashmadi. Ammo ham Vashington, ham Moskva tomonida hali juda katta ishlar oldinda turibdi”, — deya javob berdi.
Uchrashuv to‘liq yopiq va maxfiy shaklda o‘tkazilgani, muzokaralarning asosiy mazmuni oshkor etilmasligi aytildi. AQSH delegatsiyasi Putin bilan bo‘lgan uchrashuv natijalarini Donald Trampga shaxsan yetkazadi, shundan so‘ng ehtimol telefon orqali Moskva bilan yana muloqot davom ettiriladi.