Қамчиқда милтиқ кўтарган эркак дўконга бостириб кириб, сотувчи аёлни жароҳатлади
Ҳодиса юзасидан жиноят иши қўзғатилган.
Ижтимоий тармоқларда Тошкент вилоятининг Оҳангарон туманида милтиқ кўтарган эркак дўконга кириб, сотувчи аёлни жароҳатлагани акс этган видео тарқалди. Видеода эркакнинг қўлида милтиқ билан дўконга кириб, бақир-чақир қилгани, сўнгра сотувчига зарба бергани акс этган.
Тошкент вилояти Ички ишлар бош бошқармаси маълумотига кўра, 22 октябрь куни «Кўксарой» маҳалласида яшовчи 33 ёшли R.Q. ўзининг шаръий никоҳдаги турмуш ўртоғи, 35 ёшли N.Sh. билан жанжал сабабли дўконга келган ва унга таҳдид қилиб, тан жароҳати етказган.
Мазкур ҳолат юзасидан Жиноят кодексининг 109-моддаси 2-қисми билан жиноят иши қўзғатилди. Гумонланувчи терговга жалб қилинган, унинг ТОЗ-34 русумли ов қуроли мусодара қилинган ва овчилик гувоҳномаси бекор қилинган.
Суд-тиббий экспертиза натижасига кўра, жабрланувчи аёл енгил тан жароҳати олган.
Ҳозирда ҳолат Тошкент вилояти ИИББ томонидан тўлиқ назоратга олинган, Оҳангарон тумани ИИБ тергов ҳаракатларини олиб бормоқда.
