Ijtimoiy tarmoqlarda Qashqadaryo viloyatining Koson tumanida maktab o‘quvchilari to‘qqiz yoshli bolani zo‘rlaganlikda gumon qilinayotgani aytilgan xabar tarqaldi. Holat yuzasidan tuman Maktabgacha va maktab taʼlimi bo‘limi munosabat bildirdi.
Holat joriy yilning 11 may kuni kunduzi soat 15:16 chamasida yuz bergan. Maktabning 3-sinf o‘quvchilarining 8 nafari darsdan keyin sport zaliga kirishgan va o‘zaro o‘yin o‘ynab turgan vaqtlarida maktabning ikki nafar 5-sinf o‘quvchilari ham sport zaliga kirishgan. Ular o‘zlaridan quyi sinfda o‘qiyotgan o‘quvchilarni qo‘rqitib sport zalidan bir nechtasini chiqarib yuborishgan. Sport zalida qolgan 4 nafar 3-sinf o‘quvchilarini sport zalidagi kichkina xonaga kiritgan va o‘zlarining qo‘llarida bo‘lgan o‘yinchoq rezinka “ilon” bilan kiyimlarini yechtirib ularning bir nafarini badaniga, jumladan, belidan pastki qismiga ham urgan va ularni tashlab chiqib ketishgan. Bu holatdan xafa bo‘lgan o‘quvchi uyiga ketgan va qo‘rquv natijasida hech kimga hech narsa aytmagan. Oradan 3 kun o‘tgach, bolaning sinfdoshi uning onasiga bo‘lgan voqea haqida aytib bergan, bu voqeadan taʼsirlangan ona bolasini tibbiy ekspertiza qildirmasdan turli so‘zlarni boshqa OAV vakillariga aytgan.
Hozirgi kunda tibbiy ekspertiza xulosasining toza chiqqanligi haqida shifokorlar og‘zaki maʼlumot berishgan va uning tasdig‘i kelgusida ochiqlanishi haqida maʼlumot berishgan. Ayni paytda voqea tuman IIB tergov bo‘limi tomonidan o‘rganilmoqda, maktab rahbariyati yoki boshqa rahbarlar tomonidan bolaning ota-onasi yoki oila aʼzolariga hech qanday bosim o‘tkazilmagan, aksincha, ular bilan hamkorlikda voqeaga oydinlik kiritish choralarini ko‘rmoqda.
“Kelgusida aniqlangan eʼtiborsizlikka masʼullar uchun o‘rnatilgan tartibda jazo chorasi qo‘llanilishini maʼlum qilamiz”, — deyiladi xabarda.