Қирғизистон Президенти Шавкат Мирзиёев ва ўзбек халқига табрик йўллади
Садир Жапаров ЮНЕСКО конференциясининг 43-сессияси илк марта Париждан ташқарида Самарқандда бўлиб ўтаётгани Марказий Осиё учун тарихий аҳамиятга эга эканини қайд этди.
Қирғизистон Президенти Садир Жапаров қирғиз халқи ва ўзи номидан Ўзбекистон Президенти Шавкат Мирзиёев ва ўзбек халқини Самарқанд шаҳрида ЮНЕСКО Бош конференциясининг 43-сессиясининг очилиши билан табриклади.
"Ҳурматли Шавкат Миромонович!
Марказий Осиё учун тарихий аҳамиятга эга бўлган ва қирқ йилдан ортиқ вақт ичида биринчи марта Париждаги ЮНЕСКО бош қароргоҳидан ташқарида ўтказилаётган ушбу муҳим тадбир Ўзбекистон Республикасининг юксак халқаро мавқеининг, шунингдек, бутун Марказий Осиё минтақасининг глобал миқёсда маданий, маънавий ва гуманитар ҳамкорликнинг муҳим маркази сифатида тобора тан олинишининг яққол исботи бўлиб хизмат қилади.
Илм-фан, таълим ва маънавият бешиги бўлган қадимий Самарқанд шаҳрида бундай нуфузли форумнинг ўтказилиши конференцияга алоҳида рамзий маъно бағишлайди. Бу Ўзбекистоннинг цивилизациялар ўртасидаги кўприк ва тинчлик, ўзаро тушуниш ва ижодкорлик ғояларини жалб қилиш маркази сифатидаги ролини таъкидлайди.
Ишончим комилки, конференция давомида илгари сурилган қарорлар ва ташаббуслар таълим, фан ва маданият соҳасидаги ҳамкорлик учун янги уфқларни очади, халқлар ўртасидаги дўстликни мустаҳкамлашдек эзгу мақсадга хизмат қилади ва минтақамизнинг янада гуллаб-яшнашига ҳисса қўшади.
Қардош ўзбек халқига ушбу кенг кўламли ва аҳамиятли тадбирда муваффақиятлар, самарали муҳокамалар, конструктив ечимлар ва илҳомлантирувчи натижалар тилайман", - дейилади қардош мамлакат раҳбари табригида.
