Qirg‘iziston chegara xizmatining maʼlum qilishicha, 14 sentyabr kuni ertalab Botken tumanining Buloqboshi qishlog‘idagi chegara uchastkasida tojikistonlik chegarachilar avvalgi kelishuvlarni buzgan holda jangovar pozitsiyalarni egallagani aniqlangan.
Xabarga ko‘ra, qirg‘iz tomonining hududni tark etish haqidagi qonuniy talablariga eʼtibor bermay, tojik chegarachilari o‘t ochgan. Bunga javoban qirg‘iz chegarachilari ham o‘t ochgan. Chegara xizmati Tojikiston tomoni minomyotlardan foydalanganini daʼvo qilmoqda.
«2022 yil 14 sentabr kuni soat 09:30 (Toshkent vaqti bilan 08:30) holatiga ko‘ra, otishmalar goh boshlanib, goh to‘xtab turibdi», — deyiladi chegara xizmati xabarida.
Maʼlumot uchun: Qirg‘iziston va Tojikiston chegarasi vaqti-vaqti bilan ikki mamlakat mahalliy aholisi va chegarachilari o‘rtasidagi nizolar hududiga aylanib turadi. Bunga sabab delimitatsiya qilinmagan yerlar bo‘lib, u yerlarda davlatlar o‘rtasidagi chegara qayerdan o‘tishini aniqlab bo‘lmaydi.