Қорақалпоғистонда иккита буғунинг жасади топилди
Ҳайвонлар браконьерлар томонидан қўйилган тузоққа тушган. Браконьерлар эса воқеа жойида ўзлари учун ташкил қилинган пистирмани пайқаб, қочиб кетишган.
Экология, атроф-муҳитни муҳофаза қилиш ва иқлим ўзгариши вазирлиги маълумотларига кўра,16 июль куни соат 06:00 да Қорақалпоғистон Республикаси Қуйи Амударё давлат биосфера резерватининг Беруний давлат ўрмон хўжалиги участкасида 2 та Бухоро буғусининг жасади топилган. Улар браконерлар томонидан қўйилган тузоққа тушган.
Ҳайвонларнинг нобуд бўлишига алоқадор шахсларни аниқлаш мақсадида инспекторлар томонидан воқеа жойида пистирма ташкил қилинган. Натижада бир неча соат ўтгач, ниқобли икки номаълум шахс пистирмага яқинлашган, аммо инспекторларни пайқаб, воқеа жойидан яширинишган.
Қайд этилишича, Қуйи Амударё қўриқхонаси инспекторларининг ўтказган тезкор ҳаракатлари натижасида Беруний тумани ИИБ ходимлари билан ҳамкорликда воқеага алоқадор браконерлар — Беруний тумани Бийбозор қишлоғида яшовчи 1993 йилда туғилган Ш.А., 1990 йилда туғилган Р. Б. ва 1985 йилда туғилган И.Д. лар қўлга олинган.
Ҳозирда ушбу шахсларга нисбатан Беруний тумани ИИБ томонидан ҳайвонларнинг нобуд бўлганлиги факти юзасидан терговга қадар текширув ишлари олиб борилмоқда.
