7-sentabrga o‘tar kechasi Rossiya harbiylari keng ko‘lamli urush boshlanganidan buyon Ukrainaga qarshi eng yirik havo hujumini amalga oshirdi. Zarba oqibatida Kiyevdagi Vazirlar Mahkamasi binosiga ilk bor zarar yetdi.
Ukraina harbiy-havo kuchlari ma’lumotlariga ko‘ra, 6-sentabr oqshomidan 7-sentabr tongiga qadar Rossiya armiyasi tomonidan 818 ta havo zarbasi berilgan. Bu hujum tarkibiga 805 ta “Shahed” turidagi dron va turli imitatorlar, 9 ta “Iskander-K” qanotli raketasi hamda 4 ta “Iskander-M/KN-23” ballistik raketalari kiradi.
Ukraina havo hujumidan mudofaa tizimlari 751 ta nishonni – 747 ta uchuvchisiz uchoq va 4 ta qanotli raketani urib tushirishga muvaffaq bo‘lgan. Shunga qaramay, 9 ta raketa va 56 ta dron nishoniga yetib, 37 ta obyektning vayron bo‘lishiga sabab bo‘lgan. Hujum 11 soatdan ortiq davom etgan.