2026-yil boshiga kelib, Rossiyada istiqomat qiluvchi xorijiy fuqarolar soni 5,7 millionga kamaydi, bu o‘tgan yilga nisbatan 10 foizlik kamayish demakdir. Bu haqda “Vedomosti” nashri Ichki ishlar vazirligi Migratsiya xizmati tahlil bo‘limi boshlig‘i Aleksandr Perejogin maʼlumotlariga tayangan holda xabar berdi.
Pasayishning asosiy sabablari sifatida qonunchilikning qatʼiylashishi va bolalar uchun taʼlim talablari ko‘rsatilgan. 2025-yildan boshlab rus tili imtihonidan muvaffaqiyatli o‘ta olmagan migrantlarning farzandlarini Rossiya maktablariga qabul qilish taqiqlangan. Ichki ishlar vazirligi vakili Irina Volkning aytishicha, farzandlariga asosiy umumiy taʼlim bera olmagan chet elliklar mamlakatga kirish huquqidan mahrum qilinishi mumkin.
Mutaxassislar taʼkidlashicha, migratsiya qonunlarining qattiqlashuvi, shuningdek nazorat ostidagi shaxslar reestrining joriy etilishi va vizasiz qolish muddatlarining qisqarishi ham chet elliklar sonini kamaytirishga taʼsir ko‘rsatmoqda. Endilikda, vizasiz qolish muddati bir kalendar yili davomida 90 kundan oshmasligi talab qilinadi.
Rossiya hukumati 2024-yildan boshlab immigratsiya siyosatini kuchaytirib, xorijiy ishchilarni jalb qilish orqali ishchi kuchi yetishmovchiligi muammosini hal qilish choralarini ko‘rmoqda. Shu bilan birga, xorijiy turmush o‘rtog‘i bo‘lgan Rossiya fuqarolari uchun vaqtinchalik yashash ruxsatlarini olish jarayoni cheklangan.