Саида Мирзиёева иштирокидаги ҳайъат Шайх Заед номидаги “Инсоний биродарлик” мукофоти совриндорларини аниқлади

 

 

Бирлашган Араб Амирликларида Шайх Заед номидаги “Инсоний биродарлик” халқаро мукофотининг 2026 йилги совриндорлари расман эълон қилинди. Мазкур мукофот дунё миқёсида динлараро тотувлик, ўзаро ҳурмат, ижтимоий адолат ва инсон салоҳиятини ривожлантиришга ҳисса қўшаётган шахслар ҳамда ташаббусларни қўллаб-қувватлашга қаратилган.

 

Жорий йилда мукофот Озарбайжон ва Арманистон ўртасида имзоланган тарихий тинчлик келишуви ҳамда афғон қизлари ва аёллари таълим ҳуқуқи учун курашиб келаётган ҳуқуқ фаоли Зарқа Яфталига берилди. Мазкур тинчлик битими Кавказ минтақасида ўнлаб йиллар давом этган қарама-қаршиликларни бартараф этиш йўлидаги муҳим сиёсий қадам сифатида эътироф этилди.

 

Совриндорларни танлаш жараёни халқаро нуфузга эга бўлган мустақил ҳакамлар ҳайъати томонидан амалга оширилди. Ҳайъат таркибидан турли давлатлар ва минтақалардан таниқли сиёсий, диний ва гуманитар арбоблар ўрин олган. Улар орасида Ўзбекистон Республикаси Президенти администрацияси раҳбари Саида Мирзиёева ҳам бор. У Марказий Осиёдан ушбу ҳайъатга киритилган биринчи ва ҳозирча ягона вакил ҳисобланади.

 

Эътироф этилган тинчлик келишуви икки давлат раҳбариятининг мураккаб тарихий муаммоларни зўравонлик эмас, балки мулоқот ва келишув орқали ҳал этишга бўлган сиёсий иродасини намоён этади. Озарбайжон Президенти Илҳам Алиев ушбу мукофотни минтақавий ва глобал тинчликка қаратилган саъй-ҳаракатларга берилган юксак баҳо сифатида қабул қилганини билдирди. Арманистон Бош вазири Никол Пашинян эса уни икки халқ ўртасидаги ишончни мустаҳкамловчи рамзий ва умумий ютуқ, дея таърифлади.

 

Мукофот совриндори Зарқа Яфтали ўз навбатида ушбу эътироф афғон аёллари ва қизлари учун умид ва руҳий таянч бўлишини таъкидлади. У узоқ йиллар давомида таълим олиш имкониятидан маҳрум қатламлар учун билим ресурслари яратиш, ижтимоий ва психологик ёрдам кўрсатиш ҳамда маҳаллий даражада қўллаб-қувватлаш ташаббусларини йўлга қўйиб келмоқда.

 

Маълумот ўрнида, Шайх Заед номидаги “Инсоний биродарлик” мукофоти 2019 йилда Абу Дабида Рим папаси Франсиск ва Ал-Азҳар бош имоми Аҳмад ат-Таййиб ўртасида бўлиб ўтган тарихий учрашув шарафига таъсис этилган. Шу пайтгача мукофот дунёнинг турли минтақаларидан бўлган ўнлаб нуфузли шахслар ва ташкилотларга топширилган.

 

2026 йилги совриндорларни тақдирлаш маросими 4 февраль куни, БМТ томонидан белгиланган Халқаро инсоний биродарлик кунида Абу Даби шаҳрида бўлиб ўтади.