Самарқандда 737 млн сўмлик ноқонуний олтин савдоси тўхтатилди
Қўлга олинган шахслардан икки нафари аввал ҳам судлангани аниқланган.
Давлат хавфсизлик хизмати Қашқадарё вилояти бўйича бошқармаси ҳамда Иқтисодий жиноятларга қарши курашиш департаменти ходимлари ҳамкорлигида Самарқанд вилоятининг Каттақўрғон туманида тезкор тадбир ўтказилди.
Тадбир давомида Навоий ва Самарқанд вилоятларида яшовчи, 1982, 1984 ва 1996-йилларда туғилган уч нафар фуқаро қонунга хилоф равишда умумий оғирлиги 475 грамм бўлган икки бўлак олтин қуймани сотишга уринган вақтида қўлга олинди. Улар ушбу қимматбаҳо металларни харидорга 737 миллион сўмга сотишга келишган бўлиб, олдиндан 500 миллион сўм олаётганида ашёвий далиллар билан ушланди.
Давлат асиллик даражаси назорати инспекцияси хулосасига кўра, топилган 994 проба асилликдаги олтин қуймаларнинг соф оғирлиги 472 грамм бўлиб, уларнинг умумий қиймати 740,4 миллион сўмни ташкил этади.
Ҳозирда мазкур шахсларга нисбатан Жиноят кодексининг 177-моддаси 4-қисми “а” банди (валюта қимматликларини қонунга хилоф равишда олиш ёки ўтказиш) билан жиноят иши қўзғатилиб, тергов ҳаракатлари олиб борилмоқда.
Шуни алоҳида таъкидлаш лозимки, ушбу шахслардан икки нафари аввал судланган бўлиб, улардан бири ҳозирда ахлоқ тузатиш ишлари жазосини ўтамоқда.
