Samarqand viloyatining Pastdarg‘om tumanida joylashgan 83-sonli umumta’lim maktabida begona shaxslar tomonidan maktab o‘quvchilariga nisbatan zo‘ravonlik sodir etildi. Holat 29-aprel kuni ro‘y bergani, zo‘ravon shaxslar maktab direktori orqali o‘quvchi qizlarni tashqariga chiqarishga erishgani haqida xabarlar tarqaldi.
Ijtimoiy tarmoqlarda tarqalgan ma’lumotlarga ko‘ra, maktab direktori dars vaqtida 11-sinfda o‘qiydigan qizlarni maktab tashqarisiga chiqargan. Shu yerda ularni Samarqand shahrida yashovchi 18 yoshli fuqaro kaltaklagani aytilmoqda.
Rasmiylar ushbu holatga munosabat bildirishmagan bo‘lsa-da, Pastdarg‘om tumani IIB huzuridagi Tergov bo‘limi tomonidan tergov harakatlari olib borilayotgani tasdiqlandi. Qayd etilishicha, fuqaro O‘zbekiston Respublikasi Jinoyat kodeksining 277-moddasi 3-qismi (bezorilik) bilan ayblanmoqda.
Ma’lum qilinishicha, zo‘ravonlik oqibatida maktab o‘quvchilari turli darajadagi tan jarohatlari olgan. Holat yuzasidan surishtiruv ishlari davom etmoqda.