Saraton hujayralari tananing immunitet tizimidan yashiringan holda o‘sadi va tarqaladi. Immunoterapiya immun tizimiga yashirin saraton hujayralarini topish va ularga hujum qilish imkonini beradi. Bu esa saraton bilan kasallangan bemorlarning uzoq umr ko‘rishiga yordam beradi. Biroq, ko‘plab bemorlarga ushbu inqilobiy muolajalar juda kam taʼsir qiladi yoki umuman foyda bermaydi.
immun nazorat nuqtasi ingibitorlari eng ko‘p ishlatiladigan immunoterapiya vositalaridan hisoblanadi. Ular saraton hujayralari immunitet tizimidan yashirinish uchun foydalanadigan oqsillarni tanib olish va bloklash orqali ishlaydi.
Biroq, bu oqsillarga ega bo‘lmagan saraton hujayralari turli yo‘llar bilan yashirinadi. Ushbu saraton turlari bilan og‘rigan bemorlarga immun nazorat nuqtasi ingibitorlari taʼsir qilmagani sababli, tadqiqotchilar boshqa yangi immunoterapiya usullarini ishlab chiqishga intilmoqda.
Yaponiyaning Osaka universiteti olimlari yangi tadqiqotda tetratsiklin antibiotiklari zamonaviy immunoterapiya usullaridan farqli ravishda immun tizimiga saraton hujayralarini aniqlashda yordam berishini aniqladi. Ushbu antibiotiklar T-limfotsitlar deb nomlanuvchi immunitet hujayralarini saratonga hujum qilish va uni yo‘q qilish uchun rag‘batlantiradi.
“Biz o‘pka saratoni bilan og‘rigan bemorlarning qon va o‘simta to‘qimalarida tetratsiklin antibiotik minotsiklinini sinab ko‘rdik, — deydi yetakchi muallif Mari Tone. — Biz minotsiklin saraton hujayralari tomonidan ishlab chiqarilgan immunosupressiv oqsil bo‘lgan galaktin-1ga taʼsir qilib, T-limfotsitlarning o‘simtaga qarshi faolligini oshirishini aniqladik”.
Olimlar galaktin-1 sitotoksik T-limfotsitlarning o‘simtaga kirishining oldini olish orqali saraton hujayralariga immunitet tizimidan qochishga yordam berishini aniqladi. Tetratsiklin bilan davolashdan so‘ng, galaktin-1 endi T-limfotsitlarni o‘simtaga hujumini to‘xtata olmadi. galaktin-1ni bloklash saratonni davolashning yangi usullari uchun kalit bo‘lishi mumkin.
“Ushbu antibiotiklar saraton kasalligini davolashda qo‘llaniladigan immun nazorat nuqtasi ingibitorlari va boshqa immunoterapiya preparatlaridan farqli taʼsir mexanizmiga ega. Umid qilamizki, ushbu tadqiqot turli immun yo‘llariga taʼsir qiluvchi va saraton kasalligiga chalingan odamlarga, ayniqsa zamonaviy immunoterapiya taʼsir qilmayotgan bemorlarga foyda keltirishi mumkin bo‘lgan yangi dorilarni ishlab chiqishga olib keladi”, — deydi tadqiqot muallifi Kota Ivaxori.
Tetratsiklin antibiotiklari ko‘p yillar davomida butun dunyoda yuqumli kasalliklarga chalingan bemorlarni davolash uchun ishlatiladi. Endi bu eski dorilar hozirda davolanish imkoniyatlari kam bo‘lgan saraton bilan og‘rigan bemorlar uchun yangi immunoterapiya usullari uchun yo‘l ochib berishi mumkin.