Sirdaryo viloyatida ekin maydonlarini suv bilan ta’minlashni yaxshilash maqsadida “Sultonhovuz” nomli yirik suv ombori barpo etiladi. Prezident Shavkat Mirziyoyev 4 dekabr kuni Xalq deputatlari Sirdaryo viloyati Kengashining navbatdan tashqari sessiyasida ushbu loyiha kelgusi yildan Boyovut tumanida boshlanishini ma’lum qildi. Omborning umumiy sig‘imi 100 million kub metrga teng bo‘ladi.
Rasmiy ma’lumotga ko‘ra, suv ombori ishga tushgach, Boyovut, Guliston, Sayxunobod, Sirdaryo va Mirzaobod tumanlaridagi jami 110 ming gektar yerda yiliga ikki mahal hosil olish imkoniyati yaratiladi. Bu esa viloyatning qishloq xo‘jaligi ishlab chiqarishida sezilarli o‘sishga xizmat qilishi kutilmoqda.
Prezident meliarativ holatni yaxshilash bo‘yicha ham topshiriqlar berdi. Jumladan, viloyatdagi 16 ming kilometr uzunlikdagi zovurlarni bosqichma-bosqich tozalash belgilandi. Shuningdek, hozirda 200 ming gektarga yaqin ekin yerlarining kuchli yoki o‘rta darajada sho‘rlangani ta’kidlanib, sho‘rlangan yerlarni sog‘lomlashtirish bo‘yicha pilot loyiha Sirdaryoda sinovdan o‘tkaziladi.
Sessiyada suv hisobini yuritish tizimini takomillashtirish masalasi ham ko‘tarildi. Mas’ullarga Sirdaryoni suv resurslari boshqaruvi bo‘yicha namunali hududga aylantirish vazifasi yuklatildi.