Сўнгги ҳафта трансферлари
Европа клубларида ўзгаришлар давом этмоқда.
Европада футбол клублари ҳали ҳам бирин-кетин бир қатор футболчилар билан шартнома тузмоқда. Баъзи трансферлар ҳақиқатдан ҳам ҳайратланарли. Бунга мисол тариқасида Сес Фабрегас трансферини кўрсатиш мумкин.
Қуйида ўтган ҳафта давомида амалга оширилган трансферлар бўйича маълумотларга эга бўласиз.
Жанлука Скамакка: “Сассуоло” → “Вест Ҳем” (36 миллион евро)
Ёзда “ПСЖ” ва “Вест Ҳем” вакиллари 23 ёшли ҳужумчини қўлга киритиш учун рақобатга киришишди. Италиялик футболчининг Париж клубига кўчиб ўтиши ҳақида жуда кўплаб хабарлар берилганди. Аммо кейинчалик “Сассуоло” футболчи учун 50 миллион евро талаб қилди. Сўнгра футболчининг нархи тушиб кетди, бундан Лондон клуби унумли фойдаланди. Ўтган мавсумда баланд бўйли ҳужумчи А Серияда яхши натижа қайд этди. Жанлука 36 учрашувда 16 та гол урди.
Чарлз де Қуэтеларе: “Брюгге” → “Милан” (32 миллион евро)
21 ёшли футболчининг айтишича, у “Милан”нинг қизиқишини билиб, ҳайратда қолган. Чарлз А Сериянинг топ-клубига ўтишдан олдин Бельгия чемпионатининг энг қиммат футболчилари қаторида бўлган. Футболчи ўтган мавсумда барча турнирларда 48 та ўйинда майдонга тушиб, 18 та гол урган ва 10 та голли узатмани амалга оширган.
Ренату Санчес: “Лилл” → “ПСЖ” (15 миллион евро)
Португалиялик иқтидор яна бир бор клубини ўзгартирди. Бир неча ҳафта олдин “Лилл” президенти Оливе Летанг футболчи учун икки топ-клуб “ПСЖ” ва “Милан” даъвогарлик қилаётганини маълум қилганди. Шундан сўнг 24 ёшли футболчи Франция клубини танлади. Шартнома имзолагандан кейин, Ренато Лига 1да ўйнаш катта масъулият талаб этишини айтди. У ўтган мавсумда барча мусобақаларда 29 та ўйин ўтказиб битта гол урди ва бешта голли узатмани амалга оширган.
Давид Раум: “Ҳоффенхайм” → “РБ Лейпциг” (26 миллион евро)
Бир йил олдин “Ҳоффенхайм” футболчини текинга сотиб олганди. Яқинда уни 26 миллион еврога сотишди. Бу ёмон натижа эмас. Ўтган мавсум чап қанотда ўйнаган Раум 3 та гол урди ва 13 та голли узатмани амалга оширди. Эндиликда 24 ёшли футболчи бу йилги Чемпионлар лигасида ҳам иштирок этади.
Карни Чуквуэмека: “Астон Вилла” → “Челси” (17,9 млн евро)
Футболчи Премьер-лигада бор-йўғи 14 та ўйин ўтказган. 18 ёшли ўйинчи учун “Челси” катта пул тўлади. Австрияда нигериялик оиласида туғилган Карни Англиянинг 21 ёшгача бўлган терма жамоасида тўп суради. У “Нортгемптон Таун” академиясида ўқиган. 2021 йилда у ёшлар жамоалари ўртасидаги мусобақада Англия кубогини қўлга киритди. Финалда унинг жамоаси “Ливерпул”ни мағлуб этди. Бундан ташқари, Чуквуэмека “Астон Вилла” ёшлар жамоасининг энг яхши футболчиси сифатида этироф этилди. Энди у фаолиятини “Челси”да давом эттиради, шартнома олти йилга мўлжалланган.
Габриел Слонина: “Чикаго Файр” → “Челси” (9,09 млн евро)
“Челси” билан шартнома имзолаган яна бир 18 ёшли футболчи. Бироқ, дарвозабон ҳозирча АҚШда қолади. Ижара шартларига кўра, Слонин 2022 йил охиригача Чикаго клубида ўйнайди. Дарвозабон АҚШдаги энг ишончли истеъдодлардан бири ҳисобланади. Слонина “Чикаго Файр” билан биринчи профессионал шартномасини 14 ёшида имзолаган. Слонина аслида полшалик. Аммо у мамлакат терма жамоасига бўлган таклифни рад этди. Чунки футболчи Америкада ўйнашни хоҳлайди.
Бернд Лено: “Арсенал” → “Фулҳем” (3,6 миллион евро)
Лено Рамсдейлнинг ҳаракатидан кейин “Арсенал”нинг биринчи дарвозабони сифатидаги ўрнини йўқотди. Немис футболчиси ўтган мавсумда Премьер-лигада бор йўғи тўртта ўйин ўтказди. Бернд ўринбосар ролини ташлаб, ўзига янги жамоа топишни тўғри деб билди. Лено эндигина 30 ёшга тўлди.
Каспер Шмейхел: “Лестер” → “Нитца” (1 миллион евро)
Шмейхелни бошқа клуб сафида кўриш жуда ноодатий ҳолат. Сўнгги 11 йил давомида у “Лестер”да 470 тадан ортиқ ўйин ўтказди. Ҳамда бутун профессионал фаолиятини Буюк Британияда ўтказди. 35 ёшли дарвозабон инглиз клубини тарк этиш қарори жуда қийин бўлганини тан олди. Дарвоқе, “Нитца”да Шмейхелнинг ҳамюрти бўлган форвард Долберг тўп сурмоқда. Франция клуби ҳам Конференция лигаси саралашида ўйнайди. “Лестер” эса еврокубокларсиз қолди. Шмейхел янги жамоаси билан 3 йиллик шартнома имзолаган.
Аарон Ремзи: “Ювентус” → “Нитца” (эркин агент)
Француз жамоаси келгуси мавсум учун таркибни жиддий равишда кучайтиради. Июль ойи охирида уэлслик футболчи “Ювентус” билан шартномани бекор қилган ва бир неча кундан кейин эса француз клуби билан шартнома имзолаганди. Ўтган мавсумда у А Серияда бор йўғи 3 та ўйинда майдонга тушди. Шундан сўнг жароҳатлари сабаб таркибга киритилмади. У мавсумнинг иккинчи ярмини “Рейнжерс” сафида ижара асосида ўтказди.
Сес Фабрегас: “Монако” → “Комо” (эркин агент)
Испаниялик Фабрегас 35 ёшга тўлди. Аммо у шу вақтда Италия иккинчи дивизиони жамоасига ўтишини ҳеч ким ўйламаганди. Сес бир қатор топ-клублар сафида ўйнаган. Уларга “Арсенал”, “Барселона”, “Челси” жамоаларини мисол қилиб келтиришимиз мумкин. Фабрегаснинг ўзи ҳам икки йиллик шартнома имзолаганидан сўнг “Комо”ни футболдаги энг ёрқин ва улуғвор лойиҳалардан бири деб атади. Балки бир йилдан сўнг биз бу жамоани А Серияда кўрармиз. Бунинг клуб жуда катта меҳнат қилиши керак.
Жамшидбек Амиров
