Bugun Sog‘liqni saqlash vazirligining navbatdan tashqari Hayʼat yig‘ilishi bo‘lib o‘tdi. Unda tizimdagi har bir yo‘nalish bo‘yicha yo‘l qo‘yilgan xato va kamchiliklar tanqidiy tahlil etildi.
Tibbiyot sohasida hal qilinishi lozim bo‘lgan muammolar ko‘p. Baʼzi hududlarda tibbiy xizmat ko‘rsatish darajasi juda past ekanligi bor gap.
Prezidenti Shavkat Mirziyoyev ham bu sohadagi byurokratik to‘siqlar va korrupsion holatlar hamon saqlanib qolayotganini to‘g‘risida jamoatchilik bilan muloqotlarda qayta-qayta to‘xtalib o‘tmoqda.
Kamchiliklar yaqqol ko‘zga tashlanadi. Masalan, o‘tgan 11 oy davomida aholidan kelib tushgan murojaatlar o‘tgan yilga nisbatan 12 mingtaga ko‘payib, 57 600 tani tashkil etgan. Ularning katta qismi sifatsiz tibbiy xizmat ko‘rsatish bilan bog‘liq masalalardir. So‘nggi besh yilda yurak-qon tomir xastaliklariga chalinish holatlari 20 foizga ko‘paygan.
Qolaversa, bitta tumanda kamida 10-15 ta laboratoriya bo‘lgani bilan qonni tahlil qilishga sharoit va mutaxassislar malakasi yetishmasligi oqibatida diabetning og‘ir asoratlari – ko‘z, buyrak va to‘piq kasalliklari bo‘yicha respublika muassasalariga murojaatlar 10 foizga oshgan.
Joylardagi masʼullarning eʼtiborsizligi sababli kichik muammolar joyida hal bo‘lmaydi. Shu sababli xalq Prezidentning Virtual va Xalq qabulxonalari, Bosh vazirning virtual qabulxonasi, Bosh prokuratura va boshqa masʼul idoralarga murojaat qilishga majbur bo‘lmoqda.
Bularning barchasi sog‘liqni saqlash sohasi boshqaruv tizimi oqsayotgani, muammoli masalalar yechimiga professional va kreativ yondashadigan kadrlar yetishmasligi bilan bog‘liq.
Shulardan kelib chiqqan holda bugun Sog‘liqni saqlash vazirligi markaziy apparatining o‘z faoliyatida natija bermagan 40 foiz xodimlari vazifasidan ozod etildi. Ularga quyi bo‘g‘in tibbiyot muassasalarida ishlash taklif qilindi.