Сурхондарёда ЙПХ ходимига пора таклиф қилган ҳайдовчи ушланди
У маст ҳолда автомобиль бошқарган ва бунинг учун чора кўрмасликни сўраган.
20-март куни Жарқўрғон туманининг “Какайди” қўрғонида хизмат олиб бораётган ЙПХ ходими “Некcия” русумли автомашина ҳайдовчисини тўхтатади. Ўзаро суҳбатда ҳайдовчининг ўғзидан спиртли ичимлик ҳиди келаётганини пайқаган ходим уни текширувдан ўтишга таклиф қилади.
Текширув натижасига кўра, ушбу ҳайдовчининг маст экани тасдиқланади. ЙПХ ходими томонидан маъмурий баённома расмийлаштирилиб, Маъмурий жавобгарлик тўғрисидаги Кодекснинг 291-моддасига кўра автомобил вақтинча сақлаш учун жарима майдонига қўйилади.
Ҳайдовчи ходимдан тегишли чора кўрмаслигини сўраган ва эвазига 300 АҚШ доллари миқдорида пул беришни таклиф қилган.
Шундан сўнг, ходим Сурхондарё вилояти ИИБ бошлиғи номига билдирги орқали мурожаат қилиб, пора таклиф қилаётган фуқарога нисбатан қонуний чора кўрилишини сўраган.
Ҳолат юзасидан 21 март куни ўтказилган тезкор тадбирда ҳайдовчи ЙПХ ходимига 300 АҚШ доллари миқдорида пулларни пора сифатида бераётганда ушланган.
Ҳозирда Жарқўрғон тумани прокуротураси томонидан терговга қадар текширув ҳаракатлари олиб борилмоқда.
