Huquq-tartibot organlari “Taftish.uz” nomi ostida faoliyat yuritgan jinoiy guruh a’zolariga nisbatan jinoyat ishini tergov qilmoqda. Ma’lum qilinishicha, 27 nafar fuqaro 21 ta holat bo‘yicha ushbu media platforma xodimlarining noqonuniy harakatlaridan jabrlanganini bildirgan. Shundan so‘ng gumonlanuvchilar protsessual tartibda ushlangan.
Tergov materiallariga ko‘ra, Elita-media MCHJga aloqador “Taftish.uz” vakillari ochiqlik va jamoatchilik nazorati shiori ostida faoliyat yuritib, aslida tovlamachilik va firibgarlikni daromad manbaiga aylantirgan. Jinoiy guruhga norasmiy rahbarlik qilgan G‘ayrat Aberayev hamda uning sheriklari fuqarolarni obro‘sizlantiruvchi videolar bilan tahdid qilib, ularni internetdan o‘chirish evaziga pul talab qilgan.
Xususan, Toshkent va Samarqand viloyatlarida tadbirkorlar bilan bog‘liq mojarolar ataylab bir tomonlama yoritilib, so‘ngra materiallarni olib tashlash uchun o‘nlab million so‘m mablag‘ talab qilingan. Ayrim holatlarda pullarni “shartnoma” bilan niqoblashga urinishlar ham aniqlangan. Tadbirkorlar bosim va tahdidlar sabab majburan pul o‘tkazgan.
Shuningdek, tergov davomida ayrim jabrlanuvchilarning sha’ni va qadr-qimmatini kamsituvchi yolg‘on videolar tarqatilgani, sud ishlariga aralashilgan holatlar ham fosh bo‘lgan. Hozirda gumonlanuvchilarga nisbatan Jinoyat kodeksining tuhmat, firibgarlik, tovlamachilik va yolg‘on axborot tarqatish bilan bog‘liq moddalari asosida ayblovlar qo‘yilgan. Ichki ishlar vazirligi boshqa jabrlangan fuqarolarni ham tergov organlariga murojaat qilishga chaqirdi.