Тошкентда бир ойда 49 кгдан ортиқ гиёҳванд моддалар тарқалишининг олди олинди
Пойтахтда гиёҳвандлик воситалари ва кучли таъсир қилувчи моддалар билан боғлиқ жами 592 та ҳолат аниқланиб, 256 та жиноят иши қўзғатилди.
Тошкент шаҳрида бир ой давомида гиёҳвандлик ва кучли таъсир қилувчи моддалар ноқонуний айланишига қарши олиб борилган тезкор-профилактик тадбирлар натижасида йирик ҳажмдаги моддалар тарқалишининг олди олинди.
Ички ишлар вазирлиги томонидан 20 ноябрдан 20 декабргача республика бўйлаб “Хавфсиз ва соғлом мамлакат” кенг кўламли тезкор-профилактик тадбирларининг учинчи босқичи ўтказилди. Бу ҳақда Тошкент шаҳар ИИББ матбуот хизмати хабар берди.
Мазкур тадбирлар доирасида пойтахтда гиёҳвандлик воситалари ва кучли таъсир қилувчи моддалар билан боғлиқ жами 592 та ҳолат аниқланиб, 256 та жиноят иши қўзғатилди. Ноқонуний муомаладан 49 килограммдан ортиқ гиёҳванд моддалар ҳамда 72 818 дона кучли таъсир қилувчи дори воситалари мусодара қилинди.
Шунингдек, 41 нафар «закладчик» аниқланиб, улардан жами 2 килограмм 710 грамм гиёҳванд модда олиб қўйилди. 285 та наркографити аниқланиб, бартараф этилди. Уларни чизган 38 нафар шахсга нисбатан маъмурий чоралар кўрилди.
Миробод туманида ўтказилган тезкор тадбирлар давомида икки нафар шахс қўлга олинди. Уларнинг Телеграм-бот орқали гиёҳванд моддалар савдоси билан шуғуллангани ҳамда нарколаборатория ташкил этгани аниқланди. Улардан умумий қиймати 2 миллиард 923 миллион 200 минг сўмга тенг, 12 600 дозани ташкил этувчи гиёҳванд ва кучли таъсир қилувчи моддалар мусодара қилинди.
Мирзо Улуғбек туманида аниқланган ҳолатда эса бир фуқаронинг уйидан 15 килограмм марихуана ва 300 дона мак кўчатлари топилди. Тезкор-қидирув тадбирлари натижасида умумий қиймати 3 миллиард 750 миллион сўмга тенг бўлган 7 500 доза гиёҳванд моддаларнинг тарқалишига чек қўйилди.
Янги Ҳаёт туманида эса ўзаро боғлиқ бўлган беш нафар шахс қўлга олиниб, «прегабалин» номли кучли таъсир қилувчи дори воситасининг ноқонуний тарқатилиши тўхтатилди. Ушбу моддалар 13 607 нафар фуқаронинг заҳарланишига сабаб бўлиши мумкин эди.
Мазкур ҳолатлар юзасидан жиноят ишлари қўзғатилиб, ҳозирда тергов ҳаракатлари олиб борилмоқда. Ушбу йўналишдаги профилактик ва тезкор тадбирлар давом эттирилмоқда.
