Тошкентда кўп қаватли уйда ёнғин юзага келди
Ҳодиса оқибатида жабрланганлар йўқ.
6 июнь куни соат 23:48 да Тошкент шаҳар Фавқулодда вазиятлар бошқармасига Бектемир тумани, “Иқбол” маҳалласида жойлашган кўп қаватли уйларнинг бирида — 11-қаватдаги хонадонда ёнғин содир бўлаётгани ҳақида хабар келиб тушган.
Воқеа жойига ёнғин-қутқарув экипажлари атиги 5 дақиқа ичида — соат 23:53 да етиб боришди. Ёнғин соат 00:22 да тўлиқ ўчирилган.
Дастлабки маълумотларга кўра, хонадондаги уй жиҳозлари ёниб зарар кўрган. Ҳодиса оқибатида тан жароҳати олганлар йўқ.
Ҳозирда ёнғиннинг келиб чиқиш сабаби ва моддий зарар миқдори аниқланмоқда.
