Тошкентда Onix ҳайдовчиси пиёдани уриб юборди — пиёда ҳалок бўлди
ЙТҲ дан сўнг автомашина Nexia-3 ва Cobalt билан ҳам тўқнашиб кетган.
Жорий йилнинг 28 ноябрь куни соат 11:10 да Юнусобод тумани Абдулла Қодирий кўчасида йўл-транспорт ҳодисаси содир бўлди. Дастлабки тергов маълумотларига кўра, 1994 йилда туғилган ҳайдовчи бошқарувидаги Onix русумли автомобиль ҳаракатланиш жараёнида руль бошқарувини йўқотган.
Натижада автомобиль йўлнинг ўнг четида турган пиёдани уриб юборган. Тўқнашувдан кейин транспорт воситаси ўнг қаторда тўхтаб турган Nexia-3 ва Cobalt автомашиналари билан ҳам тўқнашган.
ЙТҲ оқибатида пиёда олган оғир тан жароҳатлари натижасида воқеа жойида вафот этган.
Мазкур ҳолат юзасидан Тошкент шаҳар ИИББ Тергов бошқармаси томонидан Жиноят кодексининг 266-моддаси 2-қисми билан жиноят иши қўзғатилган. Тергов жараёнлари давом этмоқда.
