Usmon musʼhafi (Toshkent Qurʼoni) VII asrda hijoz xatida yozilgan bo‘lib, hozirda O‘zbekiston musulmonlari idorasi muzey kutubxonasida saqlanadi.
1997 yilda YUNESKO uni «Jahon xotirasi» ro‘yxatiga kiritgan.
O‘zbekiston Prezidenti topshirig‘iga binoan mazkur muqaddas kitobni konservatsiya va restavratsiya qilish rejalashtirilgan.
Loyihada xorijlik mutaxassislar, jumladan Kembrij universitetidan Kristine Rose, Fransiyalik restavratorlar Axelle Deleau va Coralie Barbe, shuningdek, Istanbul qo‘lyozmalar ustaxonasi va arxiv bo‘limi mudiri Nil Baydar ishtirok etmoqda.
Ular har bir sahifani sinchiklab ko‘zdan kechirib, bosqichma-bosqich taʼmirlash rejasini ishlab chiqadilar hamda kelgusida muhofaza qilish bo‘yicha tavsiyalarni beradilar.
Konservatsiya va restavratsiya ishlari Usmon musʼhafini kelajak avlodlar uchun asrab-avaylashga xizmat qiladi.
Ushbu ezgu amal O‘zbekiston Madaniyat va sanʼatni rivojlantirish jamg‘armasi hamda O‘zbekiston musulmonlari idorasining qo‘llab-quvvatlovi va nazorati ostida amalga oshiriladi.