Ertaga, 13-sentabr kuni Toshkent shahrining Yakkasaroy va Olmazor tumanlarida gaz ta’minoti vaqtincha to‘xtatiladi. Bu haqda “Hududgaz Poytaxt” matbuot xizmati xabar bermoqda.
Qayd etilishicha, kuz-qish mavsumiga tayyorgarlik ko‘rish maqsadida Olmazor tumani Sag‘bon 4-berk ko‘chasida joylashgan yerosti o‘rta bosimli D-76 mmli hamda past bosimli D-40 mmli yerusti gaz quvurlarini ta’mirlash ishlari olib boriladi. Shu munosabat bilan soat 10:00 dan 17:30 ga qadar “Hofiz Kuhakiy” mahallasidagi 125 ta hovli xonadonlarda hamda 9 ta ulgurji tashkilotlarda gaz ta’minoti vaqtinchalik to‘xtatiladi.
Shuningdek, Yakkasaroy tumani Bahodir ko‘chasida joylashgan o‘rta bosimli D-89 mmli yerusti gaz quvurini harakatdagi gaz quvuriga ulash ishlari rejalashtirilgan. Shu sababli soat 11:00 dan 17:00 ga qadar Bahodir ko‘chasidagi 2 ta ko‘p qavatli uydagi 150 ta xonadonlarda hamda 2 ta ulgurji tashkilotlarda gaz ta’minoti to‘xtatiladi.
“Ta’mirlash ishlari tugatilgandan so‘ng tabiiy gaz ta’minoti qayta tiklanadi”, — deyiladi xabarda.