AQSh prezidenti Donald Tramp Uolter Rid milliy harbiy tibbiyot markazida navbatdagi tibbiy ko‘rikdan o‘tdi. Shifokorlarning ma’lum qilishicha, davlat rahbarining umumiy sog‘lig‘i “a’lo darajada”, yurak faoliyati esa o‘z yoshiga nisbatan “taxminan 14 yoshga yoshroq” holatda ekan.
Tramp Bethesda shahridagi kasalxonada o‘tkazilgan uch soatlik tekshiruv davomida yillik profilaktik tibbiy ko‘rikdan o‘tgan, gripp va COVID-19 ga qarshi emlashlarni ham olgan. Uning shifokori, AQSh dengiz floti kapitanı Shon Barbabellaning qayd etishicha, tahlillar prezidentning yurak-qon tomir, o‘pka, asab tizimi va jismoniy tayyorgarligi yuqori darajada ekanini ko‘rsatgan.
Tibbiy tekshiruv keng qamrovli laboratoriya tahlillari, zamonaviy diagnostika usullari hamda profilaktik baholash jarayonlarini o‘z ichiga olgan. Barbabella tekshiruv Trampning yaqinlashayotgan xalqaro safarlari oldidan sog‘lig‘ini nazorat qilish maqsadida o‘tkazilganini ma’lum qildi.
Avvalroq, Tramp sog‘lig‘i bilan bog‘liq turli mish-mishlarni rad etib, o‘zining jismoniy holati “yaxshi va barqaror” ekanini ta’kidlagan edi. Shuningdek, shifokorlar ilgari unda surunkali venoz yetishmovchilik aniqlanganini bildirgan bo‘lsalar-da, bu holat prezident faoliyatiga ta’sir qilmayotgani qayd etilgan.