Turkiya hukumati Isroil Bosh vaziri Binyamin Netanyaxu va yana 36 nafar shaxsga nisbatan hibsga olish orderini rasmiy ravishda chiqardi. Ushbu qaror Istanbul Bosh prokuraturasi tomonidan qabul qilingan.
“Haber Global” xabariga ko‘ra, gumonlanuvchilarga nisbatan “genotsid” moddasi bo‘yicha ayblov ilgari surilgan. Mazkur qaror G‘azo sektoriga gumanitar yordam olib ketayotgan “Ozodlik flotiliyasi” kemalariga uyushtirilgan hujum bilan bog‘liq jinoyat ishi doirasida qabul qilingan.
Ma’lumot uchun, joriy yilning oktyabr oyi boshida Isroil harbiy-dengiz kuchlari G‘azo qirg‘oqlari yaqinida falastinliklar uchun insonparvarlik yuki ortilgan to‘qqizta kemani to‘xtatib, qo‘lga olgan edi. Isroil Tashqi ishlar vazirligi buni kemalar jangovar hududga kirib borgani va G‘azo sektoridagi dengiz blokadasi qoidalarini buzgani bilan izohlagan.