Turkiyaning Balikesir viloyatiga qarashli Sindirgi shahrida 27-oktabr kuni 6,1 magnitudali zilzila yuz berdi. Bu haqda Turkiya favqulodda vaziyatlar boshqarmasi — AFAD xabar berdi.
Ma’lumotlarga ko‘ra, zilzila markazi yer yuzasidan 6 kilometr chuqurlikda joylashgan. Kuchli silkinish oqibatida uchta bino va bir nechta savdo do‘konlari qulab tushgan. Hodisa 28-oktabr kuni tongda (Toshkent vaqti bilan soat 00:48 da) qayd etilgan.
Prezident Rajab Toyyib Erdo‘g‘an hodisadan so‘ng barcha tegishli xizmatlar, jumladan, AFAD tomonidan qutqaruv va nazorat ishlari olib borilayotganini ma’lum qildi.
“Biz jarayonni diqqat bilan kuzatib boryapmiz. Mutaxassislar jabrlangan hududlarda faoliyat yuritmoqda”, — dedi Erdo‘g‘an o‘zining X (Twitter) sahifasida.
Rasmiy ma’lumotlarga ko‘ra, Balikesir viloyatida 6,1 magnitudali zilziladan so‘ng 102 ta takroriy silkinish (aftershok) qayd etilgan. Ulardan eng kuchlisining magnitudasi 4,3 ni tashkil etgan.
Zilzila oqibatida 22 kishi tan jarohati olgan, ularning 18 nafariga tibbiy yordam ko‘rsatilib, uylariga javob berilgan. Favqulodda xizmatlar ayni damda zarar ko‘lamini baholash va xavfsizlik choralarini kuchaytirish ishlarini davom ettirmoqda.