Уйида гиёҳванд модда ва қурол сақлаган фуқаро қўлга олинди
Тошкент шаҳар ИИББга Акмал (номи ўзгартирилган) исмли шахс уйида ноқонуний равишда гиёҳванд модда ҳамда ўқотар қурол сақлаётгани ҳақида хабар келиб тушди.
Ушбу ҳолат юзасидан пойтахт ИИББ Жиноят қидирув бошқармаси ва бошқа ҳуқуқ тартибот органлари ходимлари ўзаро ҳамкорликда тезкор чора-тадбир ўтказди.
Текширув натижасида муқаддам судланган 43 ёшли Акмал исмли шахс уйидан гиёҳванд модда чекиш учун қўлда ясалган мослама, шунингдек қоғозга ўралган ўткир ҳидли ўсимлик моддаси топилди. Бундан ташқари ётоқхонадан ов қилиш учун мўлжалланган 16-калибрли ов милтиғи, 15 та ўқ ва бир қанча ўткир тиғли мосламалар борлиги аниқланди.
Уй эгаси ноқонуний ўқотар қурол ҳамда гиёҳванд воситаларни сақлашда гумон қилиниб ҳибсга олинди.
2021 йил 16 сентябрь куни ушбу ҳолат юзасидан Ўзбекистон Республикаси Жиноят кодексининг 248-моддаси 1-қисми билан айб эълон қилиниб, Акмалга нисбатан қамоққа олиш эҳтиёт чораси қўлланилди.
Ҳозирда ушбу иш юзасидан тергов-суриштирув ҳаракатлари олиб борилмоқда.
Муножат Валиева
