Янги санкциялар пакети: Россия қанча даромаддан маҳрум бўлади?

 

Сешанбага ўтар кечаси Евроиттифоқ Россияга қарши олтинчи санкциялар пакети тўғрисида келишувга эришди. Бу рус нефтига қисман эмбарго жорий этишни ҳам ўз ичига олади.

 

Ҳозирча фақатгина денгиз орқали етказиб бериладиган нефть санкциялар остига тушган. ЕИ вақтинчалик қуруқлик орқали ўтадиган "Дружба" қувурига чеклов жорий этмайди. Венгрия айнан шу қувур орқали "қора олтин" олади. Будапешт шу кунга қадар "Дружба" га чеклов жорий этилмаслиги учун ЕИ санкциялар пакетини блоклаб келаётганди.

 

Bloomberg таҳлилчиларининг ҳисоб-китобига кўра, эмбарго ортидан Москва экспортдан келаётган 10 миллиард доллардан маҳрум бўлади. Россия компаниялари ўз маҳсулотини Осиёга йўналтиради, бу ерда эса Urals маркали рус нефти Brent маркали нефтга нисбатан баррелига 34 АҚШ долларига чегирма билан сотилмоқда.

 

"Дружба" қувурининг шимолий тармоғи орқали нефть етказиб беришнинг тўхтатилиши қўшимча 12 миллиард доллар йўқотилишига олиб келади. Шу билан бирга РФ Венгрияга "қора олтин" сотиш орқали 6 миллиард доллар даромад олишда давом этади.

 

Еврокомиссия раиси Урсула фон Дер Ляйен Германия ва Польша йил охирига қадар қувур орқали нефть сотиб олишни тўхтатишга ваъда берганини маълум қилган. Натижада 90 фоиз рус нефти тақиқ остига тушади.

 

Аввалроқ Евроиттифоқ Венгрия иштирокисиз Россия нефтига қарши эмбарго жорий этиши мумкинлиги тўғрисида хабар берилганди.