Seshanbaga o‘tar kechasi Yevroittifoq Rossiyaga qarshi oltinchi sanksiyalar paketi to‘g‘risida kelishuvga erishdi. Bu rus neftiga qisman embargo joriy etishni ham o‘z ichiga oladi.
Hozircha faqatgina dengiz orqali yetkazib beriladigan neft sanksiyalar ostiga tushgan. YEI vaqtinchalik quruqlik orqali o‘tadigan "Drujba" quvuriga cheklov joriy etmaydi. Vengriya aynan shu quvur orqali "qora oltin" oladi. Budapesht shu kunga qadar "Drujba" ga cheklov joriy etilmasligi uchun YEI sanksiyalar paketini bloklab kelayotgandi.
Bloomberg tahlilchilarining hisob-kitobiga ko‘ra, embargo ortidan Moskva eksportdan kelayotgan 10 milliard dollardan mahrum bo‘ladi. Rossiya kompaniyalari o‘z mahsulotini Osiyoga yo‘naltiradi, bu yerda esa Urals markali rus nefti Brent markali neftga nisbatan barreliga 34 AQSH dollariga chegirma bilan sotilmoqda.
"Drujba" quvurining shimoliy tarmog‘i orqali neft yetkazib berishning to‘xtatilishi qo‘shimcha 12 milliard dollar yo‘qotilishiga olib keladi. Shu bilan birga RF Vengriyaga "qora oltin" sotish orqali 6 milliard dollar daromad olishda davom etadi.
Yevrokomissiya raisi Ursula fon Der Lyayen Germaniya va Polsha yil oxiriga qadar quvur orqali neft sotib olishni to‘xtatishga vaʼda berganini maʼlum qilgan. Natijada 90 foiz rus nefti taqiq ostiga tushadi.
Avvalroq Yevroittifoq Vengriya ishtirokisiz Rossiya neftiga qarshi embargo joriy etishi mumkinligi to‘g‘risida xabar berilgandi.