Omiсron штамми туфайли Япония бош вазири АҚШга бормайди
Қўшма Штатлардаги эпидемик вазиятни инобатга олиб, Кисида ташрифни 2022 йилга кўчириш ҳақида ўйламоқда.
Япония бош вазири Фумио Кисида COVID-19'нинг Omicron варианти тарқалиши сабабли декабрь ойига режалаштирилган АҚШга ташрифини кейинга қолдириши мумкин, деб хабар берди НҲК.
Оmicron'нинг тез тарқалиши, шунингдек, Қўшма Штатлардаги эпидемик вазиятни инобатга олиб, Кисида ташрифни 2022 йилга кўчириш ҳақида ўйламоқда, дейилади хабарда.
Аввалроқ, Кисида ва АҚШ президенти Жо Байден Глазгода бўлиб ўтган БМТ иқлим саммити доирасида Япония бош вазирининг декабрь ойидаги ташрифи бўйича келишиб олган эди. Япония оммавий ахборот воситаларининг хабар беришича, давлат раҳбарлари ўзаро манфаатли масалаларни, шунингдек, Хитой масаласини батафсил муҳокама қилишни режалаштирган.
Аввалроқ, Қўшма Штатларнинг 12 та штатида коронавируснинг ушбу варианти аниқланган эди. Ҳукумат эпидемик вазият туфайли қаттиқ чоралар кўришга тайёрланмоқда.
